دكيت باب الوطن
دكيت باب الوطن ... وابوابه مسدودة
ومن فتح بابه انزلن ... دمعات بخدودة
صب الدمع واشتكى ... من دون ما يحجي
وصعبة علي من شفت .. عين الوطن تبجي
آآآه يا وطنا الحلو ... راحت حلاتك وين
راحت وصارت قطع .. سودة عل الحياطين
آه ياوطنا الحلو .... يا زين يا غالي
مو انت الاول جنت .. ليش اصبحت تالي
الناس جانت كبل ... تتوسل اتشوفك
وهسة صفت بالعكس .. تتوسل اتعوفك
ابجي على بلدي .. ابجي على بغداد
عل المتحف ابجي انا .. على التاريخ والامجاد
ابجي على الصحفي .. ابجي على الفنان
وعلى الماي ابجي انا .. وعلى الاشجار ولاغصان
ابجي انا على القتل .. ما بين هل الخوان
وابجي انا على الغدر .. وعلاسة الجيران
ابجي على مذهبي .. وابجي على ديني
عل القبلة صار الذبح .. بيد المخاويني
نذبح بعضنا ذبح .. والاجنبي والمحتل
نتوسله بالبلد .. يبقى ولا يرحل
السبب خوف الشعب .. من حرب اهلية
ومن معركة قادمة .. سنية شيعية
المن يكون النصر .. والمن يكون التاج
ويا مذهب الينتصر .. وتحجله الحجاج
من يا ترى المنتصر .. لو فاض بينا السيل
ولكم ترة المنتصر .. امريكا واسرائيل
هذا العراق الحلو .. بيه الزمان اندار
ولو نار هسة طفت .. تشتعل باجر نار
الليل ذاك الحلو ... ليجنن ابغداد
اصبح يضيك الخلك .. وايامه ما تنراد
والماي ذاك العذب .. ما عاد نفس الماي
روجاته يبجن دمع .. واحزان بيه هواي
الصار بينا وجرى .. ما يخطر على البال
ومو كل دمع ينبجي .. ومو كل حجي ينكال
بسبب وبلا سبب .. نتكاتل على المال
ونسينة عدنا وطن .. وجروح بيه اشكال
هذا العراق الحلو .. ما غيره حبينا
وبغداد بيت الاهل .. البي تربينا
شاف العراق الحلو .. من الهموم اشكال
وياما انجرح هلوطن .. بس ما بجت عينة
ونصحونة ياما بشر .. نرحل لغير بلاد
وما عفنا هذا البلد .. ونحبه ظلينا
بس خايف يضيع الوطن .. ما بين هذا وذاك
وشيعوضة النا الوطن .. لامال لا أملاك
نحتاج مال الدول .. المال تهدينا
بس لو طلبنا وطن .. ياهو الوطن ينطينا؟؟؟
موضوع: دكيت باب الوطن 
الإثنين مارس 19, 2012 4:01 am
